औरंगाबाद : एका खासगी सुरक्षारक्षकाची पत्नी जुलैमध्ये बेपत्ता झाली. या प्रकरणात तक्रार दिल्यानंतरही पोलिसांना तिचा शोध लागला नाही. या प्रकरणात तक्रारदार पतीने मुंबई उच्च न्यायालयाच्या औरंगाबाद खंडपीठात हेबियस कॉर्पस याचिका दाखल केली असता, न्यायालयाने पोलिस आयुक्त, उस्मानपुरा पोलिस ठाण्याचे उपनिरीक्षक यांनी तपासाबाबत काय पावले उचलली अशी विचारणा करत 13 डिसेंबरपर्यंत अहवाल दाखल करण्याचे आदेश दिले.

कैद्याला एकदम लटकावत नाहीत फासावर, मग काय करतात पूर्वतयारी? 

उस्मानपुऱ्यातील ऍक्‍सिस बॅंकेत सुरक्षारक्षक म्हणून काम करणाऱ्या रामराव मारुती घुले (रा. मूळ परभणी जिल्हा. ह. मु. उस्मानपुरा) याची पत्नी अश्‍विनी घुले ही जुलै महिन्यात 10 महिन्यांच्या बाळाला घेऊन राहत्या घरून बेपत्ता झाली. रामराव याने 17 जुलै 2019 रोजी उस्मानपुरा पोलिस ठाण्यात पत्नी बेपत्ता झाल्याची तक्रार दिली.

17 जुलैपासून अद्यापपर्यंत फिर्यादी पतीने संबंधित पोलिस ठाण्यात पत्नीच्या तपासासंदर्भात चौकशी केली. मात्र, पत्नीचा तपास न लागल्याने पती रामराव घुले याने ऍड. सिद्धेश्‍वर ठोंबरे यांच्यातर्फे औरंगाबाद खंडपीठात हेबियस कार्पस याचिका दाखल केली.

कसा तयार करतात फाशीचा दोर? - जाणून घ्या

याचिकेच्या सुनावणीदरम्यान न्यायमूर्ती टी. व्ही. नलावडे आणि न्यायमूर्ती एस. एम. गव्हाणे यांच्या खंडपीठाने औरंगाबाद पोलिस आयुक्त, उस्मानपुरा पोलिस ठाण्याचे पोलिस उपनिरीक्षक, महाराष्ट्र शासन यांना संबंधित सुरक्षारक्षक पतीने तक्रार दाखल झाल्यापासून बेपत्ता पत्नीचा शोध घेतला का? तपासाबाबत नेमकी कोणती पावले उचलली याविषयीचा अहवाल खंडपीठात 13 डिसेंबरपर्यंत सादर करावा असे आदेश दिले. प्रकरणात पुढील सुनावणी 13 डिसेंबर रोजी होणार आहे.